Fóram Chois Fharraige um Pleanáil Teanga CTR

“Ná lig don bhád seo snámh le sruth, is leatsa an maide rámha.”
Joe Steve Ó Neachtain

Oifigigh Pleanála Teanga le fostú

Spriocdháta: 28 Eanáir 2025 @ 17.00.

Tá Fóram Chois Fharraige um Pleanáil Teanga CTR sa tóir ar fhoireann fhuinniúil, chruthaitheach le tacú le Plean Teanga Chois Fharraige a chur i bhfeidhm. Postanna ilghnéitheacha atá ar fáil ina mbeidh na daoine a cheapfar ag obair le raon leathan daoine, eagrais agus gnólachtaí ar thionscadail éagsúla le húsáid agus stádas na Gaeilge a threisiú agus a bhuanú i gCois Fharraige.

Beidh na fostaithe lonnaithe in oifigí an Fhóraim in Inis Fáil, i sráidbhaile an Spidéil, agus ag obair ar fud cheantar Chois Fharraige ó Ros an Mhíl go dtí Na Forbacha.
Fáilteofar roimh iarratais ó dhaoine leis an taithí agus/nó na cáilíochtaí seo a leanas:

Riachtanach

  • Ardchaighdeán Gaeilge, idir labhairt agus scríobh.
  • Ardscileanna cumarsáide, cur i láthair, áisitheoireachta agus idirphearsanta.
  • Fianaise ar scileanna riaracháin agus bainistiú oifige.
  • Fianaise ar eolas agus taithí ar chúrsaí teicneolaíochta; Word agus Excel go háirithe.
  • Fianaise ar thaithí ar ardáin éagsúla mheán sóisialta: Facebook, Instagram, X, TikTok.
  • Solúbthacht maidir le tráthchlár oibre.

Buntáisteach

  • Taithí i bpleanáil, i bhfeidhmiú agus i gcur i gcrích tograí.
  • Eolas agus cleachtadh ar bhainistiú airgeadais.
  • Eolas agus tuiscint ar chúrsaí pleanála teanga.
  • Eolas ar cheantar Chois Fharraige.
  • Cleachtadh ar aighneachtaí agus ar thuairiscí a réiteach agus a scríobh.
  • Ceadúnas Tiomána.

Mionsonraí faoin bpost

  • Obair lán-aimseartha atá i gceist.
  • Conradh dhá bhliain, ar féidir cur leis, atá i gceist.
  • Tuarastal suas go €51,750 a íocfar, ag braith ar thaithí.
  • Beidh deis ann a bheith rannpháirteach i Scéim Pinsin.
  • Beidh uaireanta oibre taobh amuigh de ghnáth-uaireanta oifige i gceist: obair thráthnóna agus deireadh seachtaine san áireamh.

Glaoigh ar 086 273 2279 nó scríobh chuig ptchoisfharraige@gmail.com le comhrá neamhfhoirmiúil a eagrú nó le breis eolais a fháil.

Seol litreacha iarratais, mar aon le CV agus sonraí teagmhála do bheirt mholtóirí, chuig ptchoisfharraige@gmail.com nó chuig:

An Cathaoirleach,
Fóram Chois Fharraige um Pleanáil Teanga CTR,
Inis Fáil,
An Phríomhshráid,
An Spidéal,
Co. na Gaillimhe.

An bhfuil suim agat i bpost mar OPT i gCois Fharraige?
Tá muid ag earcú.

Scéal, Scéal, Scéal…
chuile Déardaoin
8.00 i.n

Féilire
á fhorbairt
faoi láthair

Eolaire
chun dáta
23ú Mí Lúnasa 2024

Bunaíodh Fóram Chois Fharraige um Pleanáil Teanga, ar a bhfuil ionadaíocht ag eagrais dheonacha phobail, eagrais forbartha pobail, eagraíochtaí spóirt is siamsaíochta agus gnóthaí Gaeilge-bhunaithe, le feidhmiú mar cheanneagraíocht le Plean Teanga Chois Fharraige a chur i bhfeidhm.

cuir aithne orainn

Cathaoirleach
Máire Ní Neachtain

Cén fáth go mbeinn páirteach?

Aithnítear sa bPlean seo go bhfuil dúshlán sa gceantar má tá mian an phobail go leanfaidh an ceantar mar cheantar láidir Gaeltachta le cur i bhfeidhm. Chuige sin ní mór áit chinnte a bheith ag an nGaeilge mar ghnáth-theanga phobail i chuile ghné de shaol an phobail. Leis an spás poiblí sin a chosaint teastaíonn bearta agus straitéisí. Ní tharlóidh sé seo gan gníomhaíocht chomhfhiosach ó mhuintir na háite. Seans go bhféadfaí cur chuige laissez faire a thabhairt ar go leor dá bhfuil ag tarlú faoi láthair agus is léir nach leor é agus is léir freisin go bhfuil an Ghaeilge á díbirt as cuid den fhearann poiblí dá bharr.

  • Fonn ort leanacht le traidisiún neamhbhriste teanga do theaghlaigh agus do chomharsain.
  • Dílseacht a léiriú don phobal a mhair i gCois Fharraige roimhe seo.
  • Mórtas cine a léiriú.
  • Meas agat ar an oidhreacht.
  • Cur le saibhriú cultúrtha ort féin agus ar do theaghlach.
  • Cur le hilghnéitheacht chultúr na hÉireann agus an domhain.
  • Tá buntáistí fostaíochta ag Gaeilge.
  • Buntáistí geilleagracha ag Gaeilge.
  • Tacú le stadas Gaeltachta Chois Fharraige a bhuanú.

Caithfear cuid de nósmhaireachtaí teanga atá á gcleachtadh sa bpobal faoi láthair a athrú más mian linn go leanfaidh Cois Fharraige mar cheantar láidir Gaeltachta.

Céard a dhéanfaidh mise?

  • Teaghlaigh: úsáid an Ghaeilge sa mbaile agus taobh amuigh de.
  • Tuismitheoir: labhair Gaeilge le do chuid gasúir.
  • Fostóir: ná ceil an Ghaeilge i láthair na hoibre.
  • Seirbhís á soláthar agat: tabhair le fios go bhfuil fáilte roimh an nGaeilge.
  • Ball de chumann: bíodh Gaeilge mar ghnáthurlabhra sa gcumann.
  • An Óige: labhraigí Gaeilge lena chéile agus le daoine a chasann libh.
  • Caidreamh le hógánaigh: labhair i nGaeilge leo.
  • Cainteoir líofa: bí foighdeach leis an té nach bhfuil líofa fós.
  • Beagán Gaeilge agat: cuir léi, tabhair le fios gur mian leat go labhrófaí Gaeilge leat.
  • Ní labhraíonn tú Gaeilge rómhinic faoi láthair: aimsigh ócáidí inar féidir leat Gaeilge a labhair.
  • D’éirigh tú as Gaeilge a labhairt ar bhonn rialta: tosaigh á labhairt arís.

Tá tábhacht ag roinnt le chuile ghníomh, beag nó mór, a dhéantar, agus ag nós teanga chuile dhuine, óg nó sean. Is cuma cén suíomh nó ócáid teanga a bhíonn i gceist, is cuma cé chomh minic is a tharlaíonn an ócáid sin agus is cuma cé mhéid duine a bhíonn páirteach ann.

Beidh cainteoirí Gaeilge sa bpobal seo go ceann i bhfad, ach ní mór an deis a thapú anois lena chinntiú go mbeidh líon mór acu ann agus go leanfaidh na cainteoirí sin ag tabhairt na Gaeilge do na glúnta a leanfas iad féin.

Má déantar sin tógfar teaghlaigh agus gréasáin Ghaeilge sa bpobal agus leanfar le comhluadair dátheangacha eile a chothú anseo a mbeidh an Ghaeilge ar a toil acu agus tógfaidh na glúnta atá ag teacht ina ndiaidh glúnta dátheangacha eile chomh maith.